صحفية : تروي ما حصل في عرض لمين النهدي و تكذب رواية محمد على النهدي.

أكثر حاجة تخلينا ما نتقدموش وما نتطوّروش في كل المجالات هي تبرير الفشل والنفاق الي يخلينا ما نقولوش الحقيقة كيما هي ونغطيوا عين الشمس بالغربال....

ايا سيدي شدوا عندكم لمين النهدي فنان كبير وقامة من قامات المسرح والكوميديا في تونس وما ينجم ينكر هذا كان انسان جحود.. وانا مثلا نعتبر فيلم "فردة ولقات اختها " من أفضل افلام الكوميديا الناقدة والي مثلت نقلة نوعية في تاريخ السينما أواخر السبعينات .. وغيرها من الأعمال الي تفرّد بيها لمين النهدي ورسخت اسمو في الذاكرة الفنية..  

وعلى هذا الأساس انا مشيت البارح لقرطاج... مشيت لمدرسة فنية كبيرة... مشيت نحب نسمع نص قوي ونضحك ضحكة هادفة ونتلقى رسالة واضحة...لكن للأمانة وهوني نحكي كمواطنة موش كصحفية لانو البعض للأسف يحب يحتكر النقد ليه هو فقط على اساس هو صحفي مثقف واحنا صحفيين دخلاء على الفن والثقافة ( ما نعرفش على أي اساس التقييم هذا؟).. 

نرجع لرأيي بخصوص عرض "نموت عليك" للأمانة الي شفتو وسمعتو، ما فهمتوش وما ضحكنيش وما اقنعنيش.. للاسف البارح ما شفتش مسرحية، شفت شخص يثرثر بأسلوب اكل عليه الدهر وشرب، يحاول يضحك الجمهور باللكنة الريفية و بايحاءات تعودنا بيها وملينا منها.. النقد الطبقة السياسية و الأحزاب وممارساتها.. نقد سطحي مبتذل ينفّر الناس من العمل السياسي ومن الشأن العام في حين انو الفن هو حراك يومي من أجل التغيير وتشجيع المتلقي على المشاركة في صنع القرار... إنك تكون فنان يعني تبني وترسخ المواطنة في المتلقي موش تكرهو في بقية المجالات وتنفرو من الحياة العامة... العمل النقدي الساخر موش تمقعير وتشويه ، النقد هو انك تحط صبعك على الداء وتقول هات نعالجو الافة هاذي... هذا الي كنت ننتظرو البارح من لمين النهدي وما كنتش ننتظر كلام زايد ولا اسلوب هابط كيما يدعي البعض الي تقلقو من نقدنا للفنان هذا...

وعلى فكرة  انا من الناس الي كملت تفرجت في المسرحية الكل وقعدت نستنى في اللحظة الي بش يقلب فيها لمين الأمور لصالحو وكنت للأمانة نتمنى ذلك....الحقيقة وجعني برشة الموقف الي تحطّ فيه.. وما انجموش نلوموا على الجمهور ونسبوه على خاطر ما عجبوش العرض... الجمهور الي دفع فلوس وتكبد عناء المسافة موش يلعب.. جا يلوج على الفكرة والاداء المحترم الي يخرجوا من دائرة الابتذال والانحطاط... يعني ما جاش يلوج على الكلام الزايد كيما يدعي البعض... ميساليش نتعلمو نحترمو الجمهور ونحترموا موقف الجمهور كيف يقول العرض فاشل يعني فاشل... 

ونحترموا لمين النهدي زادة وما نترهدنوش عليه وما ننافقوهوش...ويزينا بربي من لغة "راجل كبير  عيب في العمر هذا يصير فيه هكا" توا هذا منطق يحترم الرجل وقيمتو الفنية؟؟  يعني لأنو رجل كبير نقبلو منو اي عمل ونقولو برافو يعطيه الصحة؟  لانو رجل كبير نغطيوا عين الشمس بالغربال ونكذبوا على أنفسنا وعليه وعلى الناس؟ َولا على خاطر اعمالو السابقة ناجحة لازم نقبلو عليه عمل فاشل؟

كان هذا اسلوبكم في الدفاع عن لمين النهدي..اسلوب النفاق وغطي عين الشمس بالغربال، و إذا النقد عندكم قلة احترام وتعتبروه عيب في حق فنان كبير (ما فهمتش شنوة يقصدوا بيها عبارة كبير، كبير في العمر أو في الأعمال وفي الحالتين كارثة لأنو النقد ما يقللش من الاحترام ) ... اذا هذا هو اسلوبكم فأكبر متضرر هو لمين النهدي ومن بعده الفن في تونس.

هذا رأيي وانا حرة فيه ونحترم بقية الآراء الناقدة الاّ الّي يسب في الآخرين لأنهم مارسوا حقهم في النقد (انت بالذات خطر على الثقافة والفن)

في انتظار عمل جديد يليق بمسيرة الفنان لمين النهدي ينسينا في خيبة البارح..... لمين النهدي "نموتوا عليك" 

بقلم الصحفية جيهان علوان ✍️